Nus tschertgain translaturAs per Firefox rumantsch

Dapi 10 onns sa il browser (u apunto: navigatur!) Firefox era rumantsch. Per Windows, OS X e Linux.
En quest temp avain nus translatà millis lingias da text. Mintga 6 emnas cumpara ina nova versiun da Firefox. La versiun actuala cumpiglia radund 10’000 lingias.

firefox sin ubuntuQuai dat in zichel lavur. Perquai tschertgain nus anc in pèr voluntariAs che gidan a translatar da l’englais (u tudestg u franzos u talian u spagnol) en rumantsch (grischun).
principis ed agidPia, per in e mintgin:
– telechargiar qua Firefox e Thunderbird (sche quels n’èn anc betg installads en versiun rumantscha sin tes computer):
https://www.mozilla.org/rm/firefox
https://www.mozilla.org/rm/thunderbird/

Per spezialistAs da translaziun, u burgaisAS ordinariAs cun l’intenziun da daventar talAs:
– sa registrar sin https://pontoon.mozilla.org/ e gist cumenzar a translatar [1] u
– ir cun tren e tram la sonda, ils 17 d’october 2015 a las 12.45 tar Liip, Limmatstrasse 183, a Turitg.

Là[2] mussain, planisain e coordinain nus il project. Sche ti has atgnas ideas u projects sumegliants: tant meglier! Nus duvrain chaus ed ideas.

En cas da dumondas da tut gener: translaziun@rumantscha.ch

Nus ans allegrain sche ti t’annunzias!

Cordials salids
Gion-Andri e Martin Cantieni

PS: raschuns betg rumantschas per software libra sco Firefox:
http://fsfe.org/about/basics/freesoftware.de.html

[1] tgi che sa decida per questa varianta: per plaschair tuttina s’annunziar cun in e-mail, per coordinar la lavur
[2] I ha lieu in inscunter da Mozilla Svizra. Sche ti has gust dad era ta participar al rest dal program: Ti es cordialmain envidà!
Per plaschair s’annunziar cun in curt e-mail. Il program dal di:

Mozilla Day 2015

Saturday, Oct 17, 2015, 10:00 AM

Liip
Limmatstrasse 183 Zürich, CH

21 Mozillians Went

Mozilla stands for an Open Web. Let’s get together and learn how you can contribute to Mozilla projects. This day will feature a few talks and then we will dive into hacking on Mozilla projects. We will provide easy bugs to start with and mentoring.Agenda10:00 – 10:15 Introduction10:15 – 10:45 Introduction to Mozilla / What is currently going o…

Check out this Meetup →

75 onns rumantsch sco lingua naziunala: NZZ preschenta software rumantscha

Avant 75 onns ha la Rumantschia pudì festivar: il rumantsch è vegnì acceptà dal pievel svizer sco lingua naziunala svizra.

A chaschun da quest giubileum ha la NZZ preschentà en in curt film tge software ch’è actualmain disponibla per rumantsch: «Rätoromanische Spuren in der digitalen Welt».

Firefox 4 è qua! Sa chapescha era per rumantsch

Oz è vegnì publitgà Firefox 4 per Windows, Mac OS X e Linux en passa 75 linguas, era per rumantsch.

Installescha ed emprova: http://www.mozilla.org/rm/firefox

Qua pos ti observar quant savens che Firefox 4 vegn telechargià. Clicca sin la turta sut a sanestra per vesair las datas dal Grischun – per exempel.

Novas funcziuns

Firefox 4 è il pli spert Firefox enfin uss. Cun augmentar la spertadad sin tut ils livels è Firefox 4 daventà duas fin sis giadas pli spert che la versiun 3.6. Adattaziuns grondas en la tracziun da JavaScript rendan bler pli svelt tut las funcziuns. Quai spargna temp durant l’aviar e chargiar paginas ed accelerescha la grafica e JavaScript.

La nova versiun da Firefox introducescha era ina nova apparientscha visuala che lascha dapli plazza per las paginas d’internet che vegnan mussadas. Novas funcziuns sco app-tabs e Panorama gidan da betg perder la survista cun navigar en l’internet. Firefox ha integrà novas funcziunalitads per proteger la sfera privata, sco per exempel «Do Not Track» che scumonda a paginas d’internet da registrar tes fastiz. In auter exempel èn las directivas per la segirtad dal cuntegn (Content Security Policy).

Firefox Sync pussibilitescha ad in utilisader dad acceder a sias datas da la cronologia, ils segnapaginas, ils tabs averts ed ils pleds-clav cun tut ses computers e telefonins. Firefox porscha era millis supplements, extensiuns e personas ed in nov administratur da supplements. Quel gida d’agiuntar ed actualisar supplements e lai adattar l’apparientscha dal navigatur.

Plinavant vegnan ussa era tecnologias dal web modernas sco HTML5 e CSS3 sustegnidas da Firefox 4. Questas tecnologias lubeschan da sviluppar paginas ed applicaziuns d’internet ch’ins pudeva fin ussa mo crear a basa da Flash – ina tecnologia cun blers sbagls. Visita «l’internet miraculus avert da Mozilla» per vesair las novas pussaivladads dal web avert – dad open source.

Fa reclama!

Ta plascha Firefox 4? Lura fa attent tias amias, tes collegas e tes tat ch’i dat la nova versiun (rumantscha!) da Firefox! Als scriva gest uss in e-mail. Sin Twitter als pos ti far attent cun far part dal mosaic da Firefox e sche ti es registrà sin Facebook pos ti publitgar in tatgader da Firefox 4 sin tia paraid.

Firefox 4.0 per rumantsch: Eliminà il sbagl «Method Not Implemented»

Cun las versiuns rumantschas da Firefox 3.5 e 3.6 na vegnan tschertas paginas d’internet betg visualisadas. Tranter auter era la pagina da la citad da Turitg: www.zuerich.ch. Enstagl da mussar la pagina, vegn be mussà ina errur «Method Not Implemented GET to / not supported.» Il sbagl cumpara tar tut las paginas che utiliseschan ina tscherta versiun da la software Apache en cumbinaziun cun in utensil da segirezza. Quest utensil n’ha betg acceptà il parameter «rm» ch’il navigatur Firefox trametta sco code per identifitgar la lingua da l’interfatscha d’utilisader dal navigatur.
Per motivs da protecziun da datas na transmetta la versiun 4.o da Firefox betg pli quest parameter a la pagina d’internet dumandada. Perquai vegnan quellas paginas ussa era puspè visualisadas a moda correcta cun la versiun rumantscha.

In pèr da las paginas che na pudevan betg vegnir mussadas cun Firefox 3.6 e funcziuneschan ussa puspè:

http://www.zuerich.ch/
http://www.urbanmag.be/
http://www.kde.de
http://www.college.ch
http://www.xio.be/
http://www.flagey.be/fr
http://www.investinghent.be/
http://www.breadcrumbs.be/
http://www.act-events.com/
http://www.balkmetafoor.be/
http://www.hooglede.be/
http://www.georgesthemailman.com/
http://www.herenigdevolksunie.be/
http://www.jozeflievens.be/
http://islamischereligionsgemeinschaft.org/
http://www.eurid.eu/
http://www.cron-job.org/
http://www.usdebtclock.org/
http://www.physicsforums.com/showthread.php?t=33426
http://www.pmo.gov.ps/
http://www.notebookcheck.net/
http://www.diffdaff.com/
https://www.bsi.bund.de/
http://www.translatewrite.com/
http://www.graficolor.ch/
http://www.sfr-fresh.com/

L’internet miraculus avert da Mozilla

Has ti gia vesì tge pussaivladads che tecnologias novas sco HTML5 u WebGL porschan? Visita la pagina «Web O’Wonder» nua che Mozilla preschenta cuntinuantamain novs exempels da paginas d’internet che fan diever da quellas tecnologias. Per contemplar tscherts da quels exempels èsi necessari che ti navigheschas cun in navigatur modern, sco per exempel Firefox 4. Ta lascha fascinar da las pussaivladads che ti scuvras en tes navigatur!

Part da la pagina d'internet www.webowonder.org

Resuns en las medias

Qua in pèr colliaziuns a gasettas e blogs che han rapportà da la nova versiun rumantscha da Firefox:

SF Online
Neue Zürcher Zeitung
20min online
Vorarlberg Online
Der Standard
Reisen-Blog
Inside-IT

Finalmain: Firefox per rumantsch

Ier è finalmain cumparida l’emprima versiun rumantscha dal navigatur Mozilla Firefox.
Telechargia ella da

http://www.mozilla.org/rm/firefox

Installescha ed emprova!

En quest artitgel chattas ti in pèr tips impurtants. Commentaris, remartgas, resuns, criticas e cumpliments èn fitg giavischads!

Mozilla Firefox - finalmain era per rumantsch.

Cordial engraziament a tuts ch’ans han gidà da realisar la translaziun. En spezial a Sara Hermann, Andrea Cantieni ed Michael Wolf! Plinavant era in grond engraziament a la Lia Rumantscha per il lectorat.

Qua in pèr tips impurtants avant ch’entschaiver:

Jau lavur enfin uss betg cun Firefox. co l’installesch jau?

  1. Fa ina visita sin http://www.mozilla.org/rm/firefox. Là pos ti telechargiar la versiun ch’è adattada per tes sistem.
  2. Sche ti has telechargià la datoteca, la pos ti installar – uschia sco mintga autra software era.
  3. Ussa es ti gia pront per navigar per rumantsch tras tut il mund virtual.

Jau lavur gia cun Firefox, dentant en in’autra lingua. Co pos jau midar?

Il pli simpel è probablamain sche ti deinstalleschas la versiun veglia e telechargias la versiun nova. Quella pos ti lura installar sco descrit survart. Nagina tema, tias datas persunalas na vegnan betg stizzadas, sche ti na selecziuneschas betg explicitamain quai.

Dus curts tips per deinstallar:

Windows: Tscherna «Start» > «Einstellungen» > «Systemsteuerung»
La pos ti tscherner «Software». Lura selecziunar «Firefox» ed «Entfernen».
E lura simplamain suandar l’assistent da deinstallaziun.

Mac: Tira simplamain il program or da l’ordinatur da programs e depona el en il chanaster da palpiri.

Pos jau installar la versiun rumantschA sper la tudestga?

Quai è sa chapescha era pussaivel. Ti stos avair installà u la versiun tudestga u rumantscha da Firefox. Installescha lura quest pachet rumantsch. Sche ti telechargias anc quest supplement, pos ti tscherner en il menu «Utensils» (Extras) il punct Linguas. Ussa pos ti adina midar tranter las linguas installadas.

Firefox rumantsch

Ussa èsi finalmain uffizial: entaifer il proxim mais vegn publitgà ina versiun rumantscha da Mozilla Firefox.
Suenter bleras uras da lavur da translaziun e divers incaps tecnics avain nus udì cun satisfacziun ch’ils sviluppaders da Mozilla han confermà l’ultima emna che l’interfatscha rumantscha dal navigatur Firefox vegnia distribuida definitivamain cun la nova versiun 3.5 da Firefox. Nus ans legrain da pudair furnir bainprest ulteriuras infurmaziuns.